Баъзида ўзингизнинг ишингизга холис баҳо бериш қийин бўлиши мумкин, айниқса, сиз ушбу касбда узоқ вақтдан буён ишлаётган бўлсангиз ва чарчоқ аломатларини сезсангиз. Ёки аксинча, яқинда мактабга келгансизу, ўзингизга бўлган ишонч бўлмаса. Яхши ўқитувчининг хусусиятлари қандай? Мутахассислар фикри билан танишинг.
Биз кичик рўйхат туздик – ўқитувчининг муҳим фазилатларига эътиборингизни қаратишингиз мумкин.
1. Яхши ўқитувчи ўқувчиларини ҳурмат қилади. Уларни нафақат “ўқувчи“, балки инсон сифатида қабул қилади, болаларнинг ҳис-туйғуларга бўлган ҳуқуқини тан олади. Барча ўқувчилар билан эътиборли ишлайди: дарсни сабр билан тушунтиради ва агар ҳамма ҳам дарҳол англай олмаса, бундан ғазабланмайди.
2. Яхши ўқитувчи болаларга ҳам, ўзига ҳам талабчан. У болалардан нафақат топшириқларни бажаришни ёки қоидаларга риоя қилишни талаб қилади, балки ўзи ҳам риоя қилади, ваъдаларни бажаради. Ва ўзи ҳам ўсиб боради, ўз фанига жуда қизиқади – илмий воқеалар, кашфиётлардан хабардор, ўқитишнинг турли усулларини билади ва улардан фойдаланади.
3. Яхши ўқитувчи синфда соғлом ҳиссий муҳитни сақлайди. Болалар ундан қўрқмайди, унга саволлар билан мурожаат қилишади, унга ишонишади. Албатта, ўқитувчи ва болалар ўртасида бир оз масофа бўлиши керак, аммо ўзаро ишончли муносабатларни ўрнатиш ва сақлаб қолиш муҳимдир. Болалар дарс давомида ёки ундан кейин ўқитувчи билан ниманидир аниқлаб олишлари, муаммолари ҳақида гаплашишлари, маслаҳат олишлари, фикрлари билан бўлишишлари мумкинлигини билишлари керак.
4. Яхши ўқитувчига мактабда ишлаш қизиқарли ва у чарчоқни қандай енгишни билади. Касбнинг муаммоларидан бири бу ҳиссий чарчашдир. Ўқитувчи иши инклюзивликни, катта масъулият ва кескинликни талаб қилади. Чарчоқ тез кўпайиб боради ва меҳнатга бўлган иштиёқнинг сезиларли пасайиши кузатилади. Бу ҳолат яхши ўқитувчини ёмонлаштирмайди, лекин ўқитиш сифатига таъсир қилиши мумкин. Шу боис кучни тиклаш муҳимдир.
5. Яхши ўқитувчини боланинг бутун ҳаёти қизиқтиради. Ўқитувчи болаларнинг нафақат мактабдаги, балки мактабдан ташқаридаги ютуқлари ва қийинчиликлари, шахсий қизиқишлари ва севимли машғулотлари ҳақида ҳам билади. Бу эса боланинг шахсияти ҳақида тўлиқроқ тасаввурга эга бўлишга ва ўзаро ишончли алоқанинг энг яхши усулини топишга ёрдам беради.
6. Яхши ўқитувчи камол топтиради. У шунчаки янги нарсаларни ўргатиш билан чекланмайди, балки болалар ҳаётда ўз ўрнини топишлари учун уларга тўғри йўл кўрсатади.
