Аттестацияда иштирок этиш учун рўйхатдан ўтиш ва мурожаат юбориш 1 мартгача амалга оширилади. Бу ҳақида Мактабгача ва мактаб таълими вазирлиги ахборот хизмати хабар берди.
Мактабгача, умумий ўрта ва мактабдан ташқари таълим ташкилотлари педагог кадрларининг жорий йилги аттестациядан ўтказиш жараёнлари 2024 йил 15-январдан бошланади. Ушбу тоифадаги педагоглар жорий йил январ-июн ойларида ўтказиладиган аттестацияда иштирок этишлари учун 15-январдан 1-мартга қадар рўйхатдан ўтиши ва мурожаат юбориши мумкин.
Аттестацияда иштирок этиш учун мурожаат юбориш 1 мартга қадар давом этади. Аттестацияда иштирок этиш учун мурожаат юборишда қуйидаги уч усулнинг биридан фойдаланиш мумкин:
- Вазирлик яратган махсус платформа орқали – pedkadr.uzedu.uz
- Ягона интерактив давлат хизматлари портали орқали – my.gov.uz
- Давлат хизматлари марказлари орқали.
Рўйхатдан ўтиш ва мурожаат юбориш бўйича видеойўриқнома
Педагоглар pedkadr.uzedu.uz платформаси орқали:
— Низомда белгиланган тартибда рўйхатдан ўтиши ва мурожаат юбориши;
— шахсий кабинети орқали малака синови ўтган куннинг ўзидаёқ аттестация натижалари билан танишиши;
— аттестация якунида педагогларга бериладиган QR-код қўйилган электрон шаклдаги сертификатларни юклаб олиши мумкин.
Маълумот учун: 2023 йилнинг 5-7 декабр кунлари “pedkadr.uzedu.uz” электрон платформаси орқали 20 та туман (шаҳар) педагоглари иштирокида малака тоифалари беришнинг янги тизими компьютерда реал вақт режимида (онлайн) тажриба-синовдан ўтказилди.
