Fan olimpiadasi viloyat bosqichidan g‘olib bo‘lgan o‘quvchilar qanday taqdirlanadilar? Sahifada ushbu savolga javob olishingiz mumkin.
Bugun Respublikamizning barcha 14 ta hududida 1-guruh fanlaridan (matematika, fizika, kimyo, biologiya, informatika) asosiy olimpiadaning III (viloyat) bosqichiga start berildi.
Viloyat bosqichi 17 ta fandan tashkil qilinib, 4-dekabr kunigacha davom etadi, bunda 33 ming nafarga yaqin 9-10-11-sinf o’quvchilarining ishtiroki kutilmoqda.
Amaldagi tartib bo’yicha asosiy olimpiadaning III bosqichida g‘olib bo‘lgan o‘quvchilar
- 1-o‘rin uchun BHMning 6 baravari (2 250 000 so‘m);
- 2-o‘rin uchun BHMning 4 baravari (1 500 000 so‘m);
- 3-o‘rin uchun BHMning 3 baravari (1125000 so‘m) miqdoridagi pul mukofoti bilan taqdirlanadi.
Mazkur bosqichda 1-2-3 o‘rinni qo‘lga kiritgan 11-sinf o‘quvchilari olimpiadaning Respublika bosqichida, shuningdek, 1-guruh fanlaridan har bir sinf bo‘yicha eng yaxshi natija qayd etgan dastlabki 5 nafar ishtirokchi xalqaro olimpiadalarda ishtirok etadigan O‘zbekiston terma jamoasiga saralashning 1-bosqichida ishtirok etish imkoniyatini qo‘lga kiritadi.
Eslatib o‘tamiz, ushbu tartib 2021/2022 o‘quv yilidan boshlab Vazirlar Mahkamasining 562-sonli qarori bilan joriy qilingan edi.
Olimpiada ishtirokchilariga omad tilaymiz!
