Umumiy oʻrta taʼlim muassasalarining 11-sinf bitiruvchilari uchun imtihon topshirish tartibi va shakllari belgilangan talablarga muvofiq tashkil etiladi.
Bir sinfda oʻquvchilarning ixtiyoridan kelib chiqib bir nechta fan tanlanishi mumkin ammo har bir oʻquvchi faqat 2 ta (Matematika (Chuqurlashtirilgan) variantini tanlagan oʻquvchilar uchun 1 ta) fandan imtihonda ishtirok etadi.
Tanlov fanlaridan imtihonlar joriy yilning 7-iyun 1-fandan, 10- iyun sanasida 2-fandan oʻtkaziladi.
Fizika fanidan imtihon oʻtkazish tartibi
Imtihon ishining har bir varianti ikki qismdan iborat boʻlib, shakli va murakkablik darajasi turlicha boʻlgan 20 ta topshiriqni oʻz ichiga oladi.
1-qism 17 ta qisqa javobli topshiriqdan tashkil topgan. Ularning 8 tasi javobni bitta yoki ikkita son koʻrinishida yozishni talab qilsa, 6 tasi bir nechta toʻgʻri javobni tanlashni talab qiladigan javoblarni raqamlar ketma-ketligi shaklida yozish talab qiladi, 3 tasi moslikni oʻrnatish (muvofiqliklar) topshiriqlaridir.
2-qism kengaytirilgan javobli 3 ta topshiriqni oʻz ichiga oladi, ularda masalaning yechimi yoki javobni oʻrganilgan hodisalar yoki qonunlarga asoslangan holda tushuntirish tarzida taqdim etish lozim.
Fizikadan imtihon variant topshiriqlarini bajarish uchun 3 soat (jami 180 daqiqa) vaqt beriladi.
Savollarga javoblarni yozish uchun maktab tomonidan oldindan tayyorlab (maktab shtampi bosilgan) qoʻyilgan A4 formatdagi qogʻozlarga yozadilar.
Kimyo fanidan imtihon oʻtkazish tartibi
Imtihon ishining har bir varianti ikki qismdan iborat boʻlib, shakli va murakkablik darajasi turlicha boʻlgan 20 ta topshiriqni oʻz ichiga oladi.
1-qism 17 ta qisqa javobli topshiriqdan tashkil topgan. Bunda javob kimyoviy formula, birligi bilan yozilgan kattalik yoki moslashtirilgan jadval koʻrinishida berilishi kerak.
2-qism kengaytirilgan javobli 3 ta topshiriqni oʻz ichiga oladi, ularda masalaning yechimini asoslab, yechimlari bilan taqdim etish lozim.
Har bir imtihon variantining savol va topshiriqlari kimyo fani boʻyicha umumtaʻlim maktablarning umumiy kimyo, anorganik, organik kimyo va kimyoviy analiz mazmun sohalarini qamrab olgan. Shuningdek, tavsiyada bilishga oid savollar, qoʻllashga va mulohazaga oid topshiriqlar boʻyicha baholash mezonlari keltirilgan.
Variantda oʻquvchiga 20 ta (10 ta umumiy kimyo, 3 ta anorganik kimyo, 6 ta organik kimyo va 1 ta kimyoviy analiz) savol beriladi. Savollarning 6 tasi (3 ta umumiy kimyo, 2 ta organik kimyo, 1 ta anorganik kimyo) bilishga, 11 tasi (5 ta umumiy kimyo, 4 ta organik kimyo, 2 ta anorganik kimyo) qoʻllashga, 3 tasi (2 ta umumiy kimyo, 1 ta kimyoviy analiz) mulohazaga oid boʻladi. Variant topshiriqlarini bajarishi uchun 240 daqiqa vaqt beriladi.
Savollarga javoblarni yozish uchun maktab tomonidan oldindan tayyorlab (maktab shtampi bosilgan) qoʻyilgan A4 formatdagi qogʻozlarga yozadilar.
Biologiya fanidan imtihon oʻtkazish tartibi
Imtihon ishining har bir varianti ikki qismdan iborat boʻlib, shakli va murakkablik darajasi turlicha boʻlgan 20 ta topshiriqni oʻz ichiga oladi.
1-qism 17 ta qisqa javobli topshiriqdan tashkil topgan. Topshiriqlar qisqa javob yoziladigan, moslashtirish va ketma-ketlikni toʻgʻri aniqlash, bir nechta javobli, fikrlar toʻgʻri yoki notoʻgʻri (T/N) ni aniqlash shaklida boʻlib, bunda javob namunaga oid bitta yoki bir necha son birligi, bosma harf bilan yozilgan boʻlishi soʻraladi.
2-qism kengaytirilgan javobli 3 ta topshiriqni oʻz ichiga oladi, ularni bajarishda berilgan savol yoki biologik masalaning yechimini asoslab, oʻz fikrini batafsil yozishi kerak.
Har bir imtihon variantining savol va topshiriqlari biologiya fani boʻyicha umumiy oʻrta taʼlimning 5 – 11 — sinflar mavzularini qamrab olgan. Shuningdek, tavsiyada bilishga oid savollar, qoʻllashga va mulohazaga oid topshiriqlar boʻyicha baholash mezonlari keltirilgan.
Har bir variantda oʻquvchiga 20 tadan topshiriq savollari beriladi. Bu topshiriqdan 5 ta bilish, 14 ta qoʻllash va 1 ta mulohaza koʻnikmalarini baholashga oid tuzilgan.
Yakuniy nazorat imtihoni test sinovida qamrab olingan biologiya fanining mazmun sohalari:
- Tabiat asoslari va uning fan va texnikadagi roli. Tiriklikning xilma-xilligi;
- Hujayra biologiyasi: hujayra tarkibi, tuzilishi va funksiyasi;
- Organizmlar biologiyasi va xilma-xilligi;
- Genetika va evolyutsiya;
- Hayotning ekosistema va biosfera darajasi umumiy qonuniyatlari.
Variant topshiriqlarini bajarish uchun 180 daqiqa vaqt beriladi.
Geografiya fanidan imtihon oʻtkazish tartibi
Imtihon ishining har bir varianti shakli va murakkablik darajasi turlicha boʻlgan 20 ta topshiriqni oʻz ichiga oladi.
1-qism 17 ta qisqa javobli topshiriqdan tashkil topgan. Bunda javob bitta yoki bir son birligi, bosma harf bilan yozilgan soʻz yoki moslashtirilgan jadval koʻrinishida berilishi kerak.
2-qism kengaytirilgan javobli 3 ta topshiriqni oʻz ichiga oladi, ularda berilgan geografik topshiriq (masala)ning yechimini asoslab, taqdim etish lozim.
Har bir imtihon biletining savol va topshiriqlari geografiya fani boʻyicha umumiy oʻrta taʼlimning 7–10-sinflar mavzularini qamrab olgan. Shuningdek, tavsiyada bilishga oid savollar, qoʻllashga va mulohazaga oid topshiriqlar boʻyicha baholash mezonlari keltirilgan.
Biletda oʻquvchiga 20 tadan savol beriladi. Savollarning 5 tasi bilish, 13 tasi qoʻllash, 2 tasi mulohaza koʻnikmalarini baholashga oid. Topshiriqlarga javob berishi uchun 120 daqiqa vaqt beriladi.
Savollarga javoblarni yozish uchun maktab tomonidan oldindan tayyorlab (maktab shtampi bosilgan) qoʻyilgan A4 formatdagi qogʻozlarga yozadilar. Bilet savollariga javob berishi uchun umumiy120 daqiqa vaqt beriladi.
Davlat huquq asoslari fanidan imtihon oʻtkazish tartibi
Imtihon ishining har bir varianti ikki qismdan iborat boʻlib, 20 ta topshiriqni oʻz ichiga oladi.
1-qism 17 ta qisqa javobli topshiriqdan tashkil topgan. Bunda javob bitta yoki bir necha son birligi, bosma harf, bosma harf bilan yozilgan soʻz yoki moslashtirilgan jadval koʻrinishida berilishi kerak.
2-qism kengaytirilgan javobli 3 ta topshiriqni oʻz ichiga oladi. Ularda berilgan savol yoki huquqiy masalaning yechimini asoslash, huquqiy munosabat ishtirokchilarining huquq va majburiyatlari yozilishi kerak.
Har bir imtihon variantining savol va topshiriqlari davlat va huquq asoslari fani boʻyicha umumiy oʻrta taʼlimning 8-11-sinflar mavzularini qamrab olgan.
Variant 20 ta topshiriqdan iborat boʻlib, ularning 5 tasi bilish, 14 tasi qoʻllash, 1 tasi mulohaza koʻnikmalarini baholaydi. Variant savollariga javob berishi uchun 180 daqiqa vaqt beriladi.
Savollarga javoblarni yozish uchun maktab tomonidan oldindan tayyorlab (maktab shtampi bosilgan) qoʻyilgan A4 formatdagi qogʻozlarga yozadilar.
Chet tili fanidan imtihon oʻtkazish tartibi
Umumtaʼlim maktablarning 11-sinflari uchun chet tili fanidan yakuniy nazorat imtihoni tinglab tushunish, oʻqib tushunish, yozish, nutq koʻnikmasini aniqlash yuzasidan oʻtkaziladi.
Imtihon gibrid shaklda tashkil etiladi. Birinchi qism uchun umumiy 90 daqiqa vaqt ajratiladi. Bunda oʻquvchilarga imtihonni yozma qismi uchun oldindan tanlagan 2 ta variant taklif etiladi.
Ogʻzaki imtihon qismida 10 ta variant orasidan oʻquvchi bitta topshiriq tanlab oʻz variantida tushgan savol yuzasidan 10 daqiqa tayyorlanadi va 4 daqiqa gapiradi.
