Assalomu aleykum. Men institutda ingliz tili o‘qituvchisi bo‘lib ishlar edim. Doktaranturaga o‘qishga kirganim sababli men ishdan bo‘shadim. Savolim shundaki, shu kungacha ishlagan davrimga mehnat ta’tiliga 50 foiz ustama qo‘shib hisoblanadimi yoki yo‘qmi?
Huquqshunos javobi:
Ha, sizga ta’til pulini hisoblashda ustamalar ham qo‘shiladi.
Mehnat kodeksining 233-moddasiga muvofiq har yilgi mehnat ta’tilida bo‘lgan vaqti uchun xodimga ushbu Kodeksning 257-moddasiga muvofiq hisoblab chiqariladigan o‘rtacha ish haqining saqlanishi kafolatlanadi.
Bunda o‘rtacha ish haqi u hisoblanadigan oydan oldingi o‘n ikki oyni tashkil etuvchi hisob-kitob davri yoxud agar xodim o‘n ikki oydan kam ishlagan bo‘lsa, amalda ishlangan davr uchun xodimga hisoblangan ish haqidan kelib chiqqan holda belgilanadi (MK 257-m 1-qism).
Shu qoidaga ko‘ra xodimning o‘rtacha oylik ish haqini hisoblashda u 12 oydan ortiq ishlagan bo‘lsa, uning ta’tilga chiqishdan oldingi 12 oylik davrda korxonadan olgan barcha to‘lovlari (ish haqi, moddiy yordam, mukofot puli hamda ustamalar) qo‘shilgan holda 12ga bo‘linadi.
Bundan ko‘rinib turibdiki, xodimga ta’til pulini hisoblashda ustamalar qo‘shiladi.
