Maktabgacha va maktab ta’limi vazirligi maktablarda «Birinchi qo‘ng‘iroq» va «Mustaqillik darsi» tadbirlarini o‘tkazish bo‘yicha tavsiyalar berib o‘tdi.
Maktabgacha va maktab ta’limi vazirligi bergan ko‘rsatmaga ko‘ra, umumiy oʻrta taʼlim tashkilotlarida “Birinchi qoʻngʻiroq” tadbirlarini joriy yilning 2-sentabr kuni soat 8:00 da “Vatan uchun, millat uchun, xalq uchun!” shiori ostida tashkil etiladi.
Maktab hududidagi maydonni mustaqillik bayrami kayfiyatida “Birinchi qoʻngʻiroq” va Mustaqillikning oʻttiz to‘rt yilligiga bagʻishlangan “Vatan uchun, millat uchun, xalq uchun!” shioriga monand tarzda bezatish; (bunda maktab imkoniyatidan kelib chiqqan holda sahna va uning atrofini bayramona bezaklar bilan jihozlanishi tavsiya etiladi.)
Bayram tadbirlarini maktab hovlisi, bogʻi yoki boshqa soya-salqin ochiq maydonlarda oʻtkazish, maktab hududini talab darajasida jihozlash, bayram tadbiri jarayonida sanitariya-gigiyena va tozalik talablariga, yongʻin va texnika xavfsizligiga rioya qilgan holda tashkil etiladi.
Tadbirga mahalla, ota-onalar, huquqni muhofaza qilish idoralari vakillarini taklif etish va tadbirni ular bilan hamkorlikda tashkil etish tavsiya qilinadi.
Maktab rahbariyati tomonidan tadbir ishtirokchilariga mustaqilligimizning oʻttiz to‘rt yillik bayrami hamda “Birinchi qoʻngʻiroq” tadbiri bilan tabriklash jarayonida yurtimizda soʻnggi yillarda erishilgan yutuqlar, amalga oshirilgan keng koʻlamli bunyodkorlik ishlari, taʼlim tizimidagi islohotlar toʻgʻrisida aniq misollar va raqamlar keltirilgan holda maʼlumot berish tavsiya etiladi.
Boshlangʻich sinf oʻquvchilarining jismoniy imkoniyatlarini inobatga olgan holda “Birinchi qoʻngʻiroq” tadbiri davomiyligini 45 daqiqadan koʻp oʻtkazmaslik tavsiya qilinadi.
Tadbir tugaganidan keyin barcha sinflarda “Mustaqillik” (“Kelajak soati”) dars mashgʻulotlari oʻtilishini ta’minlash tavsiya qilinadi.
